انقاص الوزن بسهولة .....

موضوع انقاص الوزن خديه على انه لعبة جميلة او مغامرة حلوة انتى بتعمليها وهتلاقى فالنهاية مكافئة كبيييييرة بإنتظارك 
كام مرة خسرنا حاجات كانت عنينا هتطلع عليها ومجبنهاش بسبب الوزن وندخل فالبروفا ونقعد نقيس ونقلع ونقيس ونقلع لغاية ما نلاقى حاجة تظبط علينا وكام مرة حسينا بعدم الثقه بنفسنا فلبس معين عشان شكل جسمنا الموضوع مش موضوع جرامات بتنزل وجسم بيخس لا الموضوع انك تلبس مقاس اصغر انك تتحرك بحريه ومرونه انك تحس انك عايش حياة صحية وتستمتع بحياتك .


اولا لازم تحدد وزنك كام  وعدد الكيلوجرامات اللى مفروض تنزلها 

حدد خطة زمنية طويلة المدى وقصيرة المدى عشان توصل للوزن المطلوب 

نبدأ فالخطة بتاعتنا :

لو انتى وزنك محتاج ينزل 10 kg فدا سهل جداااااا 
فالبداية حجمى من اكلك شويه يعنى تقللى الاكل وتاكلى المفيد ازاااااااااى ؟؟!!
احنا كمصريين لازم يكون فيه عالسفره رز او مكرونة وخبز دا شئ اساسى والاكل كله بيبقى بالزيت والزبدة والسمنه البلدى يعنى كميه رهييييييييبه من النشويات والدهون والدنيا مش ناقصة اصلا دهون فوق الدهون احنا عاوزين نحرق الاساسى ونوزع الدهون فالجسم كله ومتتركزش فمنطقه معينه  طيب ايه العمل بقى ؟؟؟؟

لازم فالبدايا نعمل تحليل انيميا طبعا وسكر عشان نعرف احنا هنبدأ من فين .....................لو كل الامور تمام يبقى نبدأ بقى 
الفطار :  اساسي جدااااااا ولازم يكون مفيد عشان يقدر يدينا طاقه اننا نكمل يومنا لو انتى متجوزة وقاعدة فالبيت اصحى بدرى وافطرى ولو طالبه جامعه او بتشتغلى لازم فطار قبل الشغل يستحسن انه يكون ربع رغيف جبنه او بيضه مسلوقه او اى حاجه خفيفه مفيهاش دهووووون خديلك فشنتطك ازازة مياه ونوع فاكهة تفاح برتقان موز اى حاجة بتحبيها اهم حاجة المياه .

نيجى للغدا : هتقابلى سفره مليانه بالدهون واشكال والوان من الfats فكل طبق هنعمل ايه ؟؟
ناخد 3 معالق بالضبط رز او مكرونة وكترى من السلطه وكلى قطعه اللحمة او الفراخ والخضار بس بشكل مقنن ومتكتريش من اللحمه لان لما بتكون الدهون كتيرة فالجسم بيحول البروتين اللى داخله الى دهون ع طووول والاهم انك متناميش بعد الغدا واتحركى كتيييييييييير جداااااا بعد الغدا بساعه اشربي شاى اخضر مفيد جدا وبيمنع الاكسدة  واى فواكه تتاكل بعد ساعتين من وجبة الغدا .


العشا : لازم يكون قبل النوم ب 5 ساعات ويكون خفيف وتنامى بدرى 
لان فيه اكتر من هرمون بيفرز اثناء النوم مفيدين جداااااااا للبشره والحالة النفسية والجسم كمان 
النوم بدرى بيساعدك انك تخسي وكمان بيفرز هرمون بيساعد على تحسين المزاج والصحة النفسيه واطلقوه عليه هرمون السعادة او الميلاتونين بيفرز اثناء النمو حتى الشعر بيتحسن وبشرتك بتبقى اروق 

ممكن تاكلى زبادى وتعصري عليها ليمون فالعشا ابعدى عن العيش الفينوووووو والجبنه بلاش خالص فالعشا .


اهم حاجة العبى نط الحبل واجرى واتنططى وخليكى نشيطه وحياتك كلها حركة لو نفسك هفتك على شيكولاته كلى ولو بيتزا كلى ولو بيبسي اشربي اى حاجة بس بشكل مقنن جداااااااااااااا وبمرور الوقت شهيتك هتقل ناحية الحاجات دى راقبي نفسك لو كلتى شيكولاته او حاجة سعراتها عاليا يبقى اتحركى كتير ومتتعيش وقللى من غدا اليوم اللى بعده 
اشربي مياه كتيييييييييييييييييييييييييييييييييييييييييييييييييييييييييييييييييييير جدااااااااااااااااااااااااااا واشربى الحاجات اللى بتساعد عالحرق العالى زي الشاى الاخضر بعد الاكل بساعه ممكن مرتين فاليوم وكمان القرفه بالزنجبيل والنعناع حلوة جداااا حطيها بكميات متساوية اشربيها قبل الاكل بنص ساعه .


الحاجات اللى بتتميز بسرعه الحرق ( الزبادى - الشوفان - الشاى الاخضر - القرفه - السبانخ -الجريب فروت - الزنجبيل - الموز - التفاح - التوم ) .




الاهم من الاكل وعشان النظام دا ينجح اهتمى بالصلاه وحافظى عليها وصلى باتقان وخشوع 
السلام الداخلى والطمئنينه اللى بتيجى من الصلاة بتروح للمخ على هيئه continuous signals بتحسن من وظائفه وتخليه يساعدك انك تنجزى هدفك وتحققى اللى بتتمنيه .

لازم تحبى جسمك لانه نعمة من عند ربنا وارضى عن شكله وتركيبه لو انتى كتفك عريض او عندك كرش او دراعك مليان او منطقه الحوض وعريضه او ضيقه او او او او بصى لنفسك فالمرايه هتلاقى نفسك اية من الجمال اللى ربنا ابدعها اشكريه كل يوم على نعمته وعلى فضله وحافظى عالجسد اللى وهبه ليكى خليكى ممتنة  .

لسه الحكايه هتبتدى

عدى 5 سنين من وقت نزولى مصر وهبدأ فالسنه ال6
مريت بلحظات ضعف وتخبط وبهدله وفقدان ثقه وشعور بالخذلان والندم
درست 5 سنين فحاجه مش حاباها لمجرد تحدى اللى قدامى انى اقدر اقدر اثبت ذاتى واسافر لوحدى لمكان غريب وانجح واكون صداقات مع الناس

فنهايه ال5 سنين اتحولت تحول غريب من الانسانه الانطوائيه للانسان الاجتماعيه المنفتحه
خوفى من الناس بدأ يروح شويه بشويه كنت بعيط من اقل حاجه وكتير جدااااا لاحساسي بالعجز فساعات كتيره

انا بقيت اقوى وبقيت احسن مصر مش مخيفه زى ماكنت فاكره قعدت 5 سنين بتمنى فكل يوم انى اسافر تانى واهاجر منها
دلوقتى وانا بقى قدامى انى اسافر حاسه انه كنت غبيه جدااااااا فقرارى الفراق صعب والبلد دى برغم كل اللى فيها وكل الظلم وكل الفجور اللى بقى فيها بحسها لسه فيها خير ولسه فيها طيبه وحنيه

 ممكن انا اكون نزلت مصر فعهدها المظلم لكن عاوزة استمر فيها واعافر لغايه لما ترجع تنور تانى وتتنفس حريه نفسي اعافر فكل مكان انضف شوارعها وادى فلوس لكل الفقرا اللى فيها وابنيلهم بيوت واديهم شغل واطفال الشوارع ارحمهم من برد الشتا ونار الصيف ويكون فيه ليهم مكان نضيف يتعلموا ويطلعوا حاجه مبدعه تتشرف بيهم بلدهم  والغى قنوات الهيافه اللى عالتلفزيون واشيل الافلام الهابطه وافلام العهر من قاموس السينما المصريه واقوى جهاز الشرطه عشان يمنع البلطجه ويحمى الناس جوه البلد ويحفظ البلد من عصابات السلاح والمخدرات والاثار

ولا يبقى فيه تحرش ولا انتهاك حريات ولا ازدراء اديان !

انا عندى قوه وهعافر لغاية ماغير نفسي واغير اللى حواليا ياااااااااااااااااارب

القادم اجمل

كانت تجلس على كرسي فالحديقه المجاوره لمنزله جسدها الهزيل يهتز الى الامام والخلف معتصره ورقه بيضاء بيدها وتبكى 
كنت اراقبها منذ ان جاءت واستمرت على هذه الحال لمده ساعه كامله دون ان تسكن كانت الشمس تشرف على الغياب مختبئه خلف بنايات الحى حتى بدأ المكان فالاذدحام بالاطفال والكبار اقتربت منها اكثر علنى استطيع مساعدتها لا اعلم اساعدها بماذا فقط اريد ان اقف بجانبها صامتا وكفى !!

سمعتها تقول القادم اجمل يا الله .... القادم اجمل يا الله كنت اريد احتضانها كطفله وتهدئتها ولكنى لم استطع ظللت واقفا الى ان جاء فتى صغير اقترب منها ولاحظ دموعها فقال لها بلهجه الصغير لما تبكين ؟ انا استطيع ان اضرب الذى ابكاكى بكل قوة واحكم قبضه يده الصغيره واشار لها بها ضحكت واحتضنته كثيرا وبكت ثم قبلته واخرجت من جيب حقيبتها قطعا من الشيكولاه الصغيره واهدتها اليه ومضت ...................

عفن مجتمعي

بيدايقني المجتمع الغبي اللي الواحد عايش فيه 

اللي بيعتبر ان البنت مصيرها الحتمي هو الجواز 

وانها تعيش حياتها كلها في خدمة واحد اناني وعياله 

من غير ما حد يهتم بيها او يراعيها ولا يسأل هي عامله ايه النهارده 

احتياجتها هي مش مهم اهم حاجة احتياجتهم 

مستعده تلغي نفسها وكيانها علشان خاطرهم 

الست مينفعش تنجح ولا تتعلم ولا توصل للي هيا عاوزاه لانها ببساطة كائن ثانوي 

دي الحقيقي اللي في دماغ اغلبيه الراجل لما يسمع لفظ ست 

هو عاوز يتجوز مش علشان بيحب بل علشان ياخد حب 

عاوز طول الليل والنهار واحدة مبتفكرش غير فيه وازاي تحققله امانيه 

حتى ف عز تعبها مبيرحمهاش وانتي ازاي مبهدله ف نفسك كدا 

ولما تبقى حامل وتجيب طفل يتضايق ويقولها انتي شكلك بقى مكعبر ومبقتيش ست 

الست سلعه عروسة حلوة مامتك بتشتريهالك من محل فخم وشيك علشان تبقى البضاعه نضيفة وتعجب الباشا وهو بياخدها ويقعد 
يلعب بيها لغاية ما يزهق ويمل منها وحتة منها تتكسر فيقوم راميها ويجي تراب السنين يعشش عليها وتتدبل وتيجي فيها الروح 

كل مسا وهي مرمية فركن بعييييييييييييييد لوحدها تبكي كما لو انها عمرها ما بكت وتستنفذ طاقتها كلها فالبكا لغاية مالصبح يجي وتتسحب منها الروح من تاني !!!!

انا عاوز اخطب !!!

        فالفتره الاخيره كتير جداااا كنت بشوف ناس ماشيين ف موضوع خطوبه وبياخدوا رائي اللي حواليهم من الناس دي حاله

A- دكتوره ومتقدملها مهندس وشايفه انه هو اقل منها فالمستوى العلمي لانه هندسه بتاخد بمجموع اقل من طب

B- واحد كان رايح يخطب واحده علشان عجبه شكلها بس مشكلتها انها بتلبس ليجنز (بنطلون ضيق يعني ) وكمان t-shirts ومش محجبه بس البنت مزززة وهو عاوز يتجوزها علشان كدا لكن مشكلته انه ملتزم ف هيشرط عليها من البدايه انها تلبس النقاب

C-  واحد كانت عاجباه بنت بترقص في فرح ,وخطبها واتجوزوا وبعدين طلقها بعد ما خلفت اول مولود ليه لأنها مكنتش بتحافظ على الصلاة

D- بنت بتحب واحد جدااااا لكنها سابته علشان واحد تاني فلوسه اكتر ومشهور وفالاخر المشهور دا سابها

يعني من خلال الناس دي لقيت درجه عاليه جدااا من التفكير بسطحيه رهيبه اللي متقدملها المهندس ورفضته علشان المجموع سيادتك دا باشمهندس يعني واحد دخل جامعه وكليه عريقه ودرس واشتغل على مشاريع وبعدين انت مش هتتجوزي بالمجموع اطلعوا بقى من دائره المجموع الدايرة المغلقه اللي كلكوا بتلفوا فيها انت هتعيشي مع شخص ذات وروح وكيان مش مجموع يا دكتورة !!!

********

امـــا بقى للأخوة الشباب المحترمين الملتزمين ليه متكملش اتزامك دا وتاخد بنت ملتزمه هي كمان زيك ولا انتوا ماشيين بمبدأ انكوا تهدوا اللي قدامكوا بصراحه انا موجعنيش غير موقف الدكتور الجامعي الملتزم اللي طلق مراته علشان مش ملتزمه بفرض ربنا
هو لما كان بيقولها صلي كانت بتصلي وبتلتزم بس ساعات كان ممكن تسيب فرض من الخمسه كانت بتعمل كل حاجه علشان ترضيه ولما راح سأل صاحبه الدكتور الازهري نصحه انه يسيبها ف هي غير صالحه له !!!!

يعني انت شوفتها بترقص في فرح وقدام الناس كلها وحاطه ميك اب ولابسه فستان ودي كلها مظاهر تبرج وفتنه بالنسبه لك ورضيت بكدا وخلتها تلبس النقاب ولبسته وهي سعيده بيه و فالاخر مش قادر تصبر عليها كام شهر ياما رجاله بتكون غير محترمه ف بيوتها ومش ملتزمين ومش مسؤولين لكن الزوجه بتبقى صابره وبتفضل تدعي لزوجها بالصلاح ف كل صلاة وكل وقت وانت مش قادر تصبر عليها مع انك بصبرك عليها بتاخد اجر عظيم عند ربنا ولو كنت مخلص النيه فعلا انك تهديها !!!!

(( انك لا تهدي من احببت ولكن الله يهدي من يشاء وهو اعلم بالمهتديين ))
                                                                                        الايه56_سورة القصص

اخوتي الافاضل كلكم عارفين الايه دي وحافظينها لكن سهيتوا عنها في سبيل تفكيركم السطحي وان اللي قدمكم دي هي عباره عن جسد بلا عقل جسد للمتعه وفقط للاسف مش تفكير انها هتكون رفيقه الدرب هتكون لك السند والاهل والصاحب والسكن ويوم ما تغيب عنها هتحافظ على نفسها وعلى بيتها وعلى اطفالها وتصون عرضك
       
********

البنات اللي بيحبوا الشب علشان فلوسه وعيلته او مركزه الاجتماعي الصراحه كل واحد بيدور عالشئ اللي فاقده
انتي مفكرتيش ف الانسان اللي كان بيحبك واتقدملك وراح البيت من بابه علشان يطلب ايدك ورفضتيه وكسرتيه ودوستي عليه في سبيل انك تاخدي واحدي مشهور وعنده فلوس انت ممكن تكوني سعيده بفلوسه اول فتره لكن هتعملي ايه لو طلع مدمن ولا طلعت عاداته سيئه او اهانك او جه فيوم وقالك انك واحدة ماديه ومتجوزاه علشان الفلوس هتكوني راضيه !!

مش بقولك خدي حد فقير ابدااااا بس كل اللي عاوزة اوصله انكم تتقوا الله في قلوب العباد
ربنا يهدينا ويصلح حالنا ويرد للناس عقلها اللي غاب عنها وبتحركهم حاجات بتروح وبتيجي الجمال بيروح والمال والشهره بيروحوا مش هيتبقى لك غير القلب اللي عشت معاه والعشره الطيبه

والف الف مبرووووووووك وربنا يتمم على خير ^_________^

one ... two ... three... action

بقالي سنه ونص مدخلتش على مدونتي الحبيبه نظرا لأنشغالي فالدراسه واخيييييييييرا بقيت ف سنة البكالوريوس والحمدلله ^_^ 

لما رجعت وقريت الحاجات اللي كنت كاتباها افتكرت زكريات ومشاعر كتيييييييييييييير كانت اتنست واتحفظت في سجلات الذاكره والغبار ملأها بس انا مكنتش متخيله ولا مدركه مدى الصراع الداخلي اللي كنت فيه !!!

بس انا حاليا شايفه انو طبيعي اني اعيش فالصراع دا يمكن لأني قضيت 17 سنه من حياتي برا مصر 
عادات مختفله وتقاليد مختلفة بس المبادئ والاخلاق واحده  لكن اختلاف الحياة والطبيعه والناس وانك بتتعامل مع كل الناس من كل صنف لون دا في حد ذاته كان ليه تأثير عليا 

لما ابقى ف بلد تعدادها السكاني ميعديش 2 مليون غير لما تكون في محافظه تعدادها نفس العدد 

نزلت مصر فالبدايه كان عندي فوبيا من الناس , من المياه , من الشوارع , من الدوشه لدرجه اني لما كنت ادخل مول فالبدايه كنت بتخنق ومقدرش اخد نفسي بالاول ومره نطيت من القطار وهو ماشي علشان كان زحمه 

مينفعش انزل مصر بعد 17 سنه واسافر لمحافظه تانيه للدراسه بعيد عن اهلى واول يوم ليا فالكليه وكان اليوم 45 ليا فمصر مقدرتش انام يومها انا في مكان تاني مش هشوف اخواتي زي كل يوم الصبح وهما رايحن مدارسهم ماما مش معايا علشان اخد رأيها لو حجابي مضبوط ولا لأ مش هقف على الباب واخد مصروفي من بابا مشاعر رهيييييبه من الالم وامل اني اقدر احقق نفسي فالمكان اللي اتوجدت فيه !!

كان لازم يكون فيه تخبط كان لازم يكون فيه صراع وبعدين انا مش ف اي بلد دا انا فمصر بلد الاحداث والمجريات المتغيره كل 5 دقائق بلد المؤامرات والتفجيرات والاغتيالات والاتهامات بلد الصراخ في كل حاجه فالمطالب والبطاله والعطله و الفقر والحب والحرمان 

صراخ مجتمعي من الدرجه الاولى مع عدم تناغم بين افراده .....

لما برجع لبيتنا بتبقى عيلتي وحشاني اوي ببقى سعيده لتواجدي معاهم اكتر بسعادتي من اي حاجه تانيه انا معنديش اصحاب واصحابي كلهم فالجامعه من اماكن بعيده كانت الوحدة بتتسلل لي في اثناء تواجدي ف بيتنا ودا كان سبب من اسباب اكتئابي انو مفيش اصحاب ولا خروجات وبقت اقرب صاحبه ليا هي ماما 

اغلبيه المناسبات مكنتش بروحها لأني يا اما مسافره يا اما مينفعش اروح 
ظروف كتير وحالات وفاه كتييير مرت على عيلتي ومكنتش موجوده حتى اني اطبطب عليهم 

كتير وقتها كنت قبل ما انام  كنت بغمض عيني وارجع افكر واحلم واتمنى اني اخد  عائلتي ونسافر كلنا برا مصر من تاني 

حاليا الحمدلله احسن من زمان مع ان لسه الشعور والرغبه جوايا اني اسافر من تاني بس بدأت ابني زكريات جميله هنا وبدأت اكون صداقات عميقه انا راضيه الى حد ما  على اللي وصلتله مع عيلتي و فجامعتي وحياتي ومع ذاتي كمان  ويــارب يــــدوم الرضا,,,,,, 

حاول تعيش صح

تاني سكشن باطنه ليا دخلت السكشن وانا ساخطه جدا على الكليه وعلى اليوم اللي 

دخلتها فيها ولما السيكشن بدأ والدكتور بدأ يشرح العملي ويقولنا هنعمل ايه انا وقتها كنت 

واقفه بعيد وببص بشمئزاز وكمان كان هاين عليا ابكي بس خجلي من نفسي ومن زمايلي 

ف السيكشن منعني اني اعيط المهم فضلت او ساعه ونص من السيكشن وانا مجرد بس 

بتفرج ومكتفه ايدي وكنت براقب اللي بيحصل حواليا ناس شغاله هنا وناس بتسأل 

الدكتور وانا واقفه مكتفه ايدي اصل العمليه مش بالسهوله دي وقتها  فكرت مع 

نفسي هو انا هفضل كدا واقفه بتفرج السيكشن اللي مضايقني دا مش مرتبط بوقت 

وهينتهي وله اخر  طيب يبقى ضيقي دا لازم يكون ليه اخر انا هرجع بيتنا ف اخر اليوم 

مش هبقى متضايقه ب نفس الدرجه اللي كنت متضايقه بيها وقتهاو ساعتها واكيد هيعدي وهيتنسي كمان . لما فكرت كدا  لقيت نفسي  اتجرأت  اكتر وبدأت شويه بشويه اشتغل 

ووقفت مع اصحابي واشتغلت معاهم كمان وكسرت حاجز الخوف والغضب اللي جوايا  

يبقى انا ليه لما ببقى متضايقه  بخلي الحاله دي تاخد وقتها وبزياده كمان مهو كل حاجه 

ليها اخر يبقى لازم الضيق او الاكتئاب او الحزن اللي جوايا مياخدش اكتر من وقته لانه 

هينتهي وهيجي بداله اوقات سعيده كتير واوقات جميله اكتر زي ما بيكون فيه لحظات 

صعبه بتعدي علينا بيكون وراها لحظات جميله اوي مستنيانا يمكن ربنا بيختبرنا 

بالصعب عشان نقربله اكتر وبعدها بيمن علينا بفضله عشان نشكره ونحمد نعمته وفي 

الحالتين ربنا بيريد بينا الخير دايما   لازم نكون واثقين من كدا ^_^      

كم كنت مميتا لي

لم اعد اجيد التفكير فيك على ذلك النحو الجيد المحب المتفائل من وقت ان افترقنا منذ 
 تلك اللحظه وانت تنطق بكل تلك الكلمات اللي كانت مبهمة لي حين نطقتها بأن الفراق 
 بيننا حتما هو ات وان هذا الوقت المناسب لك لتتركني لكي لا تحبني اكثر واكثر ولا 
 يزداد تعلقك بي اكثر كل ما تلى كلماتك هذه كان بالنسبه الي ضجيج من الكلمات الصاخبه التي لم افهمها جيدا وعندما اوقفت حديثك الساذج وطلبت منك السكوت والرحيل لم تستطع وطالبتني بالحديث معك لفتره اطول والنظر الي اكثر حتى تحفظ ملامحي للمره الاخيره قبل رحيلك ... يالوقاحتك معي تريد ان تراني ف موقف ضعفي وتريد ان ترى قوتك في صمتي وذهولي عندها طالبتك بالانصراف لاني لا اجيد فن الوداع لمن هم بهذا السوء حاولت تمالك نفسي قدر الامكان وفاجئتك بتلك الابتسامه المصطنعه التي لن يفهمها من هم بمثل تفكيرك وعند موافقتي بطلبك بكل رقي واحترام لم تصدق عيناك من تلك التي تحدثك فاتهمتني باني لا استطيع استيعاب الموقف واني مازلت ف غفوتي فما كنت انا الغافله الساهيه انه انت الذي لم تستطع قراءة ذلك الحزن الذي كان يطعنني في   قلبي ببطء لم تستطع ان ترى نزيف ذلك القلب  الذي احبك والذي لم يسمح بدخول احد غيرك لسنين عده ولم تستطع ان تسمع انينه واهاته واستغاثاته انك ف كل يوم تعالج العديد من المرضى وتبذل قصارى جهدك ف انقاذ ارواح وتصارع الموت من اذهاقها ولكنك فشلت يا طبيبي ف انقاذ قلبي وروحي ورحلت .....

رحلت الى غير رجعه ولن تكون لك رجعه اخرى .....

                     

ايام من رمضان 2012

اجمل حاجة وقت بعد الفجر دا انا بعشق فعلا الوقت دا بطريقة عجيبة فيه قصة حب كبيرة بيني وبين الوقت دا عمري ما شوفت جمال ف حياتي الا في الوقت دا فقولت بما ان الوقت دا سبب سعادة عندي وفرحة كبيييييرة  فقولت بما اني مش بلاقي نفسي فرحانة غير ف الوقت دا خلاص انام بعد طلوع الشمس ولما الشمس اشعتها تملا الكون كله خلاص انام بقى 

                                                
                         ********************

المهم انا بقالي كام يوم مكتئبة جداااا ونفسيتي سيئة اوي الصراحة واللي كان مضايقني اكثر اني كنت متضايقة ف رمضان وطول الوقت ببكي على اتفه الاسباب ف بعدين قولت طيب يمكن انتي يا ريما ربنا غاضب عليكي وانتي عارفة ربنا مش بيقبل ع العبد الغافل عنه بس انا مش غافلة عنك يا الله انا بصلي وبقرأ قرااان وانت يارب اقرب ليا من نفسي ومعايا ف كل مكان طيب ايه سبب الضيق دا وكنت بدعي في كل صلاة اللهم فرج همي بس مكنتش مؤمنة ان الله هيستجيب لدعائي اصل انا مش بالايمان اللي ربنا ممكن يسمع دعوتي ما بين كل دعوات  المليارات الواصلة اليه ف كل ثانية من الصالحين العابدين وانا ف تفكيره دا لقيت المغرب بيأذن حطيت الاكل عالسفرة انا وماما وانا بقول الدعاء اللهم لك صمت وعلى رزقك افطرت وبك امنت وعليك توكلت ذهب الظمأ وابتلت العروق وثبت الاجر ان شاء الله جت  على بالي دعوة اللهم ارضى عني وساعدني اني اعمل ما يرضيك  واهديلي نفسي واعني عليها يارب اعني على نفسي ياااااااااااااااااااااااااااااااارب بس كان عندي يقين ان ربنا هيستجيب ان شاء الله 

وانا بصلي التراويح جت قدامي كل ايات الدعاء وشوفت قد ايه رحمت ربنا بلغت كل شئ وان اهم حاجة اني مفقدش الامل ف رحمة ربنا واني لما ادعي اكون على يقين ان الله هيستجيب وكملت وف الصلاة كان برضه نفس الدعاء يارب اعني على نفسي واهديني  ووفقني فيما يرضيك وبكيت كتييير بعد الصلاه وبعدين لقيت دفتر يومياتي قدامي وفتحته على الادعية اللي فيه ودعيت ب 

  
((( اللهم ارضني بما قسمت لي وعافني فيما ابقيت حتى لا احب تعجيل ما اخرت ولا تاخير ما عجلت ))) 

ودعيت بدعائي ف صلاة الفجر وبعدها استغفرت ربنا لطلوع الشمس ونمت وانا كل املي ان ربنا يكون استجاب ليا وان همي ينزاح واحس ان ربنا مش غضبان عليا الحمدلله ف اليوم اللي بعده كنت احسن بكتيييييييير والنهاردة الحمدلله حاسة نفسي سعيدة وفرحانة فرحانة عشان حاسة اني قربت من ربنا عشان بدأت مراقبة افعالي واقيمها واحاول اني مرتكبش ذنوب على قد ما اقدر عشان انا عاوزة ارضي ربنا وكل رجائي انه يكون راضي عني لاخر يوم ف حياتي ........

دي حياتنا ولا احنا ضيوف فيها

مش عارفة ليه بدأت احس ان دي مش حياتي انا دي حياة واحدة تانية غيري تماما 

بس هي تشبهني وانا طول الوقت بتفرج عالبنت اللي تشبهني دي بتفرج عليها من 

جوايا بشوف بعيونها وبتكلم بلسانها وباكل بأيديها وبحب بقلبها بس لو جيت انت 

وبصيت من بعيد هتشوفنا واحد بس اوعى تحكم ف يوم عليا عشان دا غلط انا مش انعكاس لنفسي او لذاتي لأ انا انعكاس لحاجات تانية كتيييييير 

من يوم ما اتولدت وماما كانت بتختار لي الفساتين بتاعتي وبابا وماما اختاروا 

مدرستي كمان وهما كمان اختاروا اطلع ايه من قبل ما افهم يعني ايه كلية طب ؟؟ 

واختارولي طبيعة الاكل اللي اكله ومين يكون اصحابي وكل حاجة متحددة تمام حتى الانسان اللي هتجوزه دا اللي انا لسة معرفش اسمه ولا سنه ولا مكانه واللي هو مفروض قدري لازم ماما وبابا يوافقه عليه ف الاول بس بجد مش حاجة غريبة دي اني ملاقيش مكان لننفسي جوه حياتي ؟؟؟؟

بدأت اتخنق شوية بشوية من الدور اللي بمثله ونفسي اتنفس حررررريــــــــــــــــــــــــه بقى :(    

                               

لـــــــــــــــــــــــــم يعد بوسع  هـــــذا  الــــــــقــــــلـــب ان يـــــــــــــــــــــصرخ اكـــــــــــثـــــــــــر 

                                                                                        "محمود درويش "  

كل لما احس اني متضايقة افتكر الجملة دي لم يعد بوسع هذا القلب ان يصرخ اكثر.

بحسها بتعبر عن اللي جوايا من غير اي كلام للاسف هو دا شعوري متضايقة جدااااااااااااا ومخنوقة كمان النهاردة اول ليلة ف رمضان ومش مفروض ابقى كدا بس مش عارفة اعمل ايه غبت كتيييير عن المدونة بتاعتي وحبيت ارجع تاني عشان عاوز افضفض للمجهول مش عاوزة احكي لاصحابي ولا لماما ولا اي حد ف الدنيا انا ونفسي وبس 

بجد يا نفسي انا فعلا اسفة اني بحملك كتييييير اوي يفوق طاقتك معلش متزعليش مني انا كل مرة بوعدك اني هتغير هبقى انسانة تانية بجد مرحة زي ماما ماهي عاوزاني وشاطرة اوي ف شغل البيت زي ما تيته عاوزاني ومحترمة ومتدينة زي ما خالتو وايمان صاحبتي عاوزاني وصايعة وشقية زي ما نانا عاوزاني ولا اقولك حاجة انا هخلكي زي ما انا عاوزاكي مش اي حد تاني هخليكي زي ما ربنا عاوزك عشان يحبك اكتر يا حبيبتي بس انا زي ما كل مرة بوعدك انا مش هوعدك المرة دي لان انت اللي هتوعديني انك هتعينيني عليكي عشان انا بجد عاوزة افرح انت عارفة اانا مفرحتش بجد من قد ايه ؟؟؟

ايوة من سنييييييييين طويلة اوي وان الاوان انك تسعدي بقى بس اعرفي ان الدنيا مش نعيم دائم ولا شقاء تام يوم كدا ويوم كدا 

بس انا عاوزة لو قابلك يوم وحش حاولي بسرعة تغيريه ولو معرفتيش صلحيه ولو غلبتي معاه خااااااااااالص امحيه من زاكرتك وافتكري انك عندك حاجات اهم عاوزة تحققيها من انك تشغلي نفسك بحاجة بتعكنن عليكي دايما 

وف النهاية بقولك يا حبيبتي اني بحبك اوي عشان انتي روحي ومعاياه من لحظة ميلادي مع اول نفس هوا حقيقي مع اول مرة فتحت عيني فيها عالمجهول يارب تبقي الى الله اقرب وعنده من المغور لهم ويكون راضي عليكي لو اتحقق كل دا انا هبقى كدا اتطمنت عليكي   

                               

                  

استطيع تغير مسار حياتي للافضل

                                                               قد ان اوان التغييير

                                                                 

PALESTINE WILL BE FREE ......

                                                            
                                                                       وان نصر الله لقريب

                                                       

أحلم بِوطن وعَلم وطابور طلابي ونَشيد ،، أحلم بعصفور يَحملني من غربتي هذه وفي الطريق يلفظني بعيدا ً ،، أحلم بغدا مختلف مشرق ، ،، أحلم بِنفسي وبصبحات مختلفة بعيدة أشد البعد عن ألم ، أحلم بِأمنية جَميلة عساها يوماً تتحقق ،، وَما أجمل ما نَتمنى ..

♥
 - دالي أبوهلال

AL TAGHRIBA ............HAMZA NAMERA

                                                                       

البعد عنك خوف .. وانا عالرجوع ملهوف

لكن هعود ازاى .. ومكانى كله ضيوف

ياقلبى ياموجوع .. يا آهه حاضنة دموع

حب البلد بيعيش .. لما يموت الجوع

ياحضن بيساعنى .. واحتجت له وباعنى

ساعة ما مد ايديه .. شاور وودعنى

لكـنى مش قلقـان .. تذكـرتى رايح جـى

انا بحب الاغنية دي جداااااا 

وبالذات المقطع دا ( لكن هعود ازاي ..... ومكاني كله ضيوف )

شعور صعب انك تكون عايش برة بلدك ولما ترجع انت لبلدك تحس انك ضيف فيها ضيف يومين وراجع تاني واللي مالي مكانك ناس ضيوف عالبلد بجد احساس صعب اوي 

وياما الناس بتواجه مشاكل كتيييييييير ف الغربة محدش يتخيلها 

بس بجد اكتر حاجة بقت مضايقاني دلوقت ان بلدنا دي في حاجة لينا احنا ففترة عصيبة جدااااا 

الشباب اللي عاوز يسافر ويهج من البلد والعيشة زي ما بيقولوا ويسافر مش عارف فين واهو يشتغل اي حاجة وربك يعدلها او حتى 

الناس اللي معاها شهادات  عالية وعاوزة تروح تشتغل بالشهادات دي عشان بدل مايكون عنده شقة تبقى فيلا وبدل العربية اللي تاعباه طول الشهر تبقى عربيتين وغيره وغيره من الاماني والاحلام كتيييير 

انا مش ضد فكرة الواحد يسافر سعيا للرزق بالعكس دي احسن حاجة ان الواحد يسعى عشان يحسن وضعه ووضع الناس اللي بتعتمد عليه بس بصدق الكلام دا تعالى بعد عشر سنين كدا وقارن بينك وبين الشخص اللي فضل قاعد هنا وبدأ مشروعه الخاص 

البداية انت سافرت واتغربت بس على قد تعبك على قد ماجنيت وهو مكانه وبيتعب بس الموضوع صعب لان في مشاكل كتييير ومش بالسهولة دي المهم لما السنين بتعدي وتلاقي شعرك بدأ يشيب ف سنين الغربة عندك فلوس وعندك العربيات والبيوت طيب ايه التمن اللي دفعته اولادك اللي كنت بعيد عنهم سنين لدرجة انهم فقدوا الاحساس بيك كأب هتقول ما انا بعمل كل دا عشانهم بس للاسف فهمك كان خاطئ .....

طيب متخيل لو طلعت بدون عقد ممكن يجرى ايه ؟طبعا هيكون ليك كفيل لازم حد يكفلك ف البلد الغريب اللي انت فيها واكيد الراجل مش هيكفلك والسلام لا لازم بياخد وساعات بياخد من تعبك وعرقك كتييير اوي وبتفضل ف مشاكل لا حصر لها كدا هتكون مرتاح ..... 

نفرض انك طالب علم ومسافر عشان تتعلم برا تمام وجمييل جداا واحييك على طموحك لكن بعد كدا هتكمل برا والعلم اللي اتنفعت بيه مش هتفيد بيه بلدك طبعا هتقول بلدي مين هيا بلدي دي اللي صرفت على تعليمي ولا سهلتلي البحث العلمي حتى البعثة اللي جت اخدها ابن العميد خلاص انا اتعلمت برا وهعيش برا .......... 

طبعا الحالات دي مش بتنطبق على كل الناس بس انا بجد حابة زي ماشوفت الملايين نزلوا التحرير وثاروا ف كل شبر من ارض مصر والاب اللي شاف احلامه واحلام اولاده عالارض دي ونزل يدافع عن حقه ومرجعش غير شهيد ودفع تمن كلمة لا للظلم غالية اوي وكانت روحه بس انا متأكدة انه من جواه بيقول فداكي الف روح وروح يا بلدي ليه الروح الوطنية اللي كانت فينا الايام دي بقت خامدة كدا؟؟ 

اكيد لسة فيه ناس متمسكة بتراب وبأرض مصر

بس انا حابة انه كل يعمل ويؤدي دوره بأكمل وجه ويخلص في عمله ويرتقي بمجتمعه متبصش للي بيحصل بلطجية مش عارف فين وحصل عملية سرقة فين... الدنيا مش امان .. البلد خربت خلاص ... الاسعار ف ارتفاع كل يوم .... مؤشر البورصة بينزل .... خلي الثوار يرتاحوا ومش عارف ايه والكلام اللي لا بيودي ولا بيجيب 

كل واحد فينا لما يشتغل صح ومايسمعش لاي كلام حواليه هيلاقي كل الناس المحيطين بيه بدأوا يقلدوه .... ايوة فعلا الناس بتحب الشخص المتفائل الطموح وبيعملوا زيه عشان يكونوا زيه هتلاقي مش انت بس اللي بدأت تتحرك لا غيرك كتير وكتييير بدأوا معاك 

وننشر ثقافة البناء والتعمير للوصول لبر الامان ببلدنا بدل السلبية والتفكير ف الهجرة وغيره 

ياااااااااااااااااااااااااااااااااااااااااااااااااااااااااااااااااااااااااارب نشوف بلدنا رائدة ف كل المجالات وعلى كل الدول ووقتها نستمتع بالي عملناه وتعبنا عشانه عشاننا وعشان الاجيال اللي  جاية بعدنا

شوفتك قبل كدا ؟؟

  عمرك قبل كدا حسيت ان الشخص اللي قدامك دا انت شوفته قبل كدا 

لا وتعرفه كمان ؟؟؟ 

بس ازاي وانت واثق انك مقابلتوش قبل النهاردة 

ممكن تقعد تبصله طول الوقت .... بس خد بالك هو ملاحظ ان فيه عيون بتراقبه وفجأة راح بص عليك 

قمت انت عملتك نفسك بتبص على حاجة تانية غيره بس عنيك كشفتك بتدور في دائرة عشوائية ومش قادرة تثبت غير عليه 

مرة تانية بتقول جواك انا لازم اكلمه 

مش يمكن كنا اصحاب زمان وانا ناسي بس من جواك انت متأكد انكوا مكنتوش اصدقاء طفولة 

هو بدأ يحس بالملاحقة والحصار اللي فرضه نظرك عليه بيحاول يختار اي مكان يقعد فيه نظرك مش ممكن يوصله 

قعدت مع نفسك وسرحت ..... طيب ياربي انا شوفته فين قبل كداااا ازاي انا حاسس اننا اعرفه وكمان اعرفه من زمان اوي دا حتى باين عليه هو كمان انه يعرفني انا لازم اكلمه ....

اول مرة تتكلم فيها كانت صعبة اوي مكنتش عارف تقول ايه بس لقيته شخص في منتهى البساطة وبجد دا طلع شخصية جميلة زي ماكنت متوقع اخدت الحكايات تسترسل ما بينكم لغاية ما عدى 5 سنين على معرفتكوا ببعض 

مكنتش متخيل انكوا ممكن تكونوا اصدقاء بالشكل القوي والمميز دا .

فاكر اول مرة شوفته فيها ؟؟؟

من رضي فله الرضا ومن سخط فعليه السخط

عدم الرضا دي مشكلة كبيرة على فكرة 

انا مش عارفة ازاي ممكن الواحد يتخلص منها بصي انا هقولك انتي قربي من ربنا اكتر فكري فكل النعم اللي حواليكي واللي بتملأ كيانك .))

دي كانت كلمات اتقالتلي ف مرة بس انا حاسة انها نزلت عليا بوقع شديد جداااااا 

انا حسيت انه هو دا السبب الحقيقي اللي مخليني تعبانة نفسيا لمدة اكتر من 3 شهور 

لاول مرة حياتي تكون مقلوبة بالشكل دا ؟؟

 لاول مرة احس ان العالم كله كارهني وبيحاول يدايقني 

من العبارات اللي بتتردد فدماغي : انت مش مثقفة زي ما انت مفكرة , على فكرة بقى انت مش جميلة , وكمان محدش بيحبك , انت مش ناجحة ف الدراسة ولا هتنجحي وكمان لما تخلصي هتبقي دكتورة فاشلة , انت انسانة انطوائية جداااااااا , عيلتك مش بتحبك عشان كدا روحتي تدرسي فجامعة بعيدة عن بيتكوا وكلااااااااااااااااااااااام كتيييير جدااااااااا

فعلا  في الفترة دي دماغي اصابت بما يسمى شلل لحظي ف التفكير 

بعدت عن اصحابي  وبعدت عن دراستي وبعدت عن كل حاجة  

عارف لما تكون انسان ,  كائن حي في جسد اموات بجد عايش عيشة اموات 

وبس رجعت البيت   وقعدت مع ماما صاحبتي وصديقتي الوحيدة اللي تعرف عني كل حاجة وهي اللي فاهماني 

واترميت فحضنها وقعدت ابكي  وف الاخر قولتلها اعمل ايه انا تعبانة بجد تعبانة جدااااا يا ماما 

انا مفيش ولا حاجة كويسة فحياتي 

حياتي مزرية جداااا لابعد مما تتصوري 

وكانت اجابتها في كلمتين 

ارضي عشان ربنا يرضى عنك 

وهي دي الجملة اللي فوقتني  من يومها وانا عشت ايام بجد انا عمري ماكنت فرحانة جداااا وسعيدة بالقدر دا لقيت نفسي لقيت اللي كانت 

تايهة بعيد عني ورافضة تصاحبني وتبقى معايا 

 لقيتها في حب ربنا وطاعته لقيتها ف مساعدة الناس كل الناس حتى اللي كنت احسبهم ميستحقوش 

ومن وقتها وانا كل ما يحاول شيطاني يدخل من بابي دا بقيت اقفله ف وشه على طول لان بجد كل حاجة ف حياتي رائعة الحمدلله 

وكمان ربنا بيكتب الخير دايما للانسان ف ازاي افكر عكس كدااا 

الحمد لله على نعمة الاسلام والحمدلله ان الله ربي 

عيدي انا

عمرك حسيت قبل كدا بسعادة كبيرة جوة قلبك عمرك ما حسيت قبل كدا قد ابه انت طاير من السعادة وبجد فرحتك مش سايعاك

انا بقى حسيت الشعور دا لاول مرة
دا كان اول عيد ليا فمصر تقريبا
ودي اول مرة احس ببهجته بس السعادة اللي انا حسيت بيها انا استمديتها من الناس اللي فرحتهم في اليوم دا
كنت بكون مبسوطة جدااااا لما ادي هدايا العيد لاولاد عمي واشوفهم فرحانين اوي بالحاجات اللي جبتهالهم مع انها بسيطة اوي بس فرحتهم اوي وفرحتني معاهم
وكمان لما روحت ازور قرايبي كنت في قمة انبساطي بجد الحمدلله على اليوم الجميل دا اللي عشته مع اهلي وربنا يخليهم ليا
                                                    

                                                             

قربت من النهاية

اصبحت في حالة من السكون والصمت وانعدام التركيز

لا اعلم ماذا حل بي الان فأنا ولأول مرة اشعر اني غير واثقة من اختياري

كم تمنيت ان تنطق بها لتخلصني من حيرتي

كل تصرفاتك كانت دليل على اللي مخبيه جوه قلبك
ا
نا عارفة انك من الناس الكتومة جدا ومش بسهولة هتصرح عاللي جواك

بس وبعدين انا اللي اعرفه انه اللي بيحب مش بيفضل صامت

تعرف ان صمتك دا خنقني خلاني افقد الامل فيك

خلاني ضعيفة من جواة

المشكلة اني بتصرف معاك ببرود بس عشان خايفة اللي جوايا يبان ليك 

و
اتكسف قدامك وقدام نفسي

بجد نفسي ف يوم اصحى الاقيك مش موجود ف حياتي

او تجيلي رسالة منك بتقولي عاللي جواك .........

منتظر ولازلت ؟؟؟

                                             الانتظار ................................................................. 




قررت اني اكتب كلمة انتظار واسيب الكلمة تعبر عن نفسها    بس بعدين قولت ليه اشوف الانتظار من جهة واحدة لما فيه اكتر من جهة ليها ؟؟؟؟ 
المهم كلمة انتظار لما بتيجي في ذهن اي واحد فينا ايه اللي بيحسه وقتها ؟؟؟

يمكن الكلمة دي دلوقت بتمثلي القلق .... قلق من النتيجة , قلق من السفر , قلق من الناس اللي هتعامل معاهم 
وبتكون لناس تانية بمعنى امل ....... لما الام تكون في انتظار معاد ولادتها ونفسها تشوف طفلها ويطلع للحياة 
امل ....... لعروسة مستنية يوم فرحها وهي هتبدأ حياة جديدة مع الشخص اللي قلبها اختاره 
امل ........ واحد مستني يوم سفره برا البلد اصل جاتله فرصة عمل ف الخارج 

وبتكون لناس تانية خوف .......... خوف لناس قاعدين فالعيادة مستنين الدكتور يقولهم ايه نتيجة التحليل دا اللي ممكن حياتهم توقف عليه 
خوف ........... لانسان طال بيه الزمن وكبر ف السن وعارف ان له نهاية ونهايته قربت 
خوف ............ للشخص اللي بيبحر للمجهول ومش عارف هيقابل ايه 

ومعاني كتيرة جدااااااا
بس لما بيطول انتظار الانسان لحاجه وهي مش  بتيجي الاحسن انه يفوق بسرعة ويقرر الاقلاع عن انتظاره 
العمر واحد ومينفعش يقضيه ف الانتظار وكمان لما بنستنى كتييييير الحاجة الجميلة اللي كنا بنتمناها بتفقد معناها 

او الواحد بيفقد شغفه بيها وساعات لما بتجيله بيلقاها ببرود متناهي ودي بتكون اكتر حاجة بتوجع وقتها

اول يوم ف رمضان

كل سنة وانتوا طيبين و رمضان كريم عليكم ان شاء الله 


رمضان السنة دي مختلف شوية وليه روح جميلة عن كل سنة الحمدلله البلد اتحررت من شلة الفاسدين و امن الدولة , المساجد هتكون مفتوحة ودروس الدين من غير اي تحكم واللي عاوز يعتكف ف المسجد هيعتكف براحته الشوارع جميلة جدا بزينة رمضان ولما امشي ف الشارع بشوف كل بلكونة معلقين فانوس كبير ومنور ومخلي منظرها جميل اوي  


زي كل اول يوم من رمضان الكريم السفرة بتكون غير بتبقى عمرانة جدا ماشاء الله وانا وماما مدعوكين يا عيني ف المطبخ من الصبح اصلنا بنكون عازمين قرايبنا عندنا اول يوم بس المرة دي مش عارفة ليه مكنتش حاسة بعطش او جوع الحمدلله 


خلصنا بدري وضيوفنا وصلوا وفطرنا الحمدلله واتمنينا من ربنا انه يتقبل صيامنا لليوم دا 
وبعدين روحت المسجد عشان نصلي انا وصاحبتي بس للاسف كان زحمة جدا ومفيش مكان اصلنا روحنا متأخر المرة دي ؟؟؟


وروحنا مسجد تاني بس برضه مفيش مكان قررنا نصلي ف البيت ونبقى نروح بدري بكرة واحنا بنتكلم قدام بابا البيت لقيت بنت خالو رايحة عشان هتصلي مع خالتو واصحابهم ف البيت فروحنا معاهم والحمدلله صلينا العشا والطراويح 


لما رجعت البيت كان فيه حالة جميلة ف بيتنا لقيت فيه هدوء وسكينة ورحمة بجد بيتنا كان تحفة وقتها 
وجت عندنا خالتو وخالو وخالتو كمان واطفالهم فكان البيت جميل وكلنا قاعدين سوا ماما كانت فرحانة جدا وانا كنت سعيدة اكتر منها ان الحمدلله رمضان السنة فيه فرحة غير كل سنة من وقت ما بقينا نقضيه ف مصر 


بس بجد رمضان ف مصر حبيبتي غير اي رمضان ف العالم واسأل المجرب اللي هو انا ^_^ 


قمر الدين وياميش وقران وذكر وقلوب عمرانة ونفوس مطمئنة وصلاة وقيام ليل 


اللهم اجعل ايامنا كلها رمضان 
وارزقنا من الخير كله ف شهرك الكريم 
اللهم اعتق رقابنا من النار 
وارزقنا رضاك علينا 
وبارك لنا فيما اعطيت 
اللهم ارحمنا برحمتك 
اللهم اغفر لنا واعفو عنا انك انت الغفور الرحيم 


                                                 ...........وكل رمضان وانتوا طيبين........... 
              

                                                              .