الاثنين، 1 أغسطس 2011

منتظر ولازلت ؟؟؟

                                             الانتظار ................................................................. 




قررت اني اكتب كلمة انتظار واسيب الكلمة تعبر عن نفسها    بس بعدين قولت ليه اشوف الانتظار من جهة واحدة لما فيه اكتر من جهة ليها ؟؟؟؟ 
المهم كلمة انتظار لما بتيجي في ذهن اي واحد فينا ايه اللي بيحسه وقتها ؟؟؟

يمكن الكلمة دي دلوقت بتمثلي القلق .... قلق من النتيجة , قلق من السفر , قلق من الناس اللي هتعامل معاهم 
وبتكون لناس تانية بمعنى امل ....... لما الام تكون في انتظار معاد ولادتها ونفسها تشوف طفلها ويطلع للحياة 
امل ....... لعروسة مستنية يوم فرحها وهي هتبدأ حياة جديدة مع الشخص اللي قلبها اختاره 
امل ........ واحد مستني يوم سفره برا البلد اصل جاتله فرصة عمل ف الخارج 

وبتكون لناس تانية خوف .......... خوف لناس قاعدين فالعيادة مستنين الدكتور يقولهم ايه نتيجة التحليل دا اللي ممكن حياتهم توقف عليه 
خوف ........... لانسان طال بيه الزمن وكبر ف السن وعارف ان له نهاية ونهايته قربت 
خوف ............ للشخص اللي بيبحر للمجهول ومش عارف هيقابل ايه 

ومعاني كتيرة جدااااااا
بس لما بيطول انتظار الانسان لحاجه وهي مش  بتيجي الاحسن انه يفوق بسرعة ويقرر الاقلاع عن انتظاره 
العمر واحد ومينفعش يقضيه ف الانتظار وكمان لما بنستنى كتييييير الحاجة الجميلة اللي كنا بنتمناها بتفقد معناها 
او الواحد بيفقد شغفه بيها وساعات لما بتجيله بيلقاها ببرود متناهي ودي بتكون اكتر حاجة بتوجع وقتها




هناك 4 تعليقات:

Ehab يقول...

لما الأنتظار بيطول بنفقد فرحتنا باللي استنيناه
عارفه ليه
لأن ساعات بنكون فقدنا الناس اللي عايزينهم يشاركونا الفرحه
ساعات بنكون فقدنا القدره على الأستفاده منه
ساعات بنكون تعبنا قوي في الأنتظار لدرجة اننا مش قادرين نستحمل نقف نفرح بيه

واكبر من ده كله انك تنتظري كتير قوي وتعملي كل الحيل علشان تصبري وتتحملي وفي النهايه يقولك برده لأ
ومش هتاخدي حقك مثلا او مش هتوصلي اللي تعبتي علشانه
ساعتها كل الساعات والشهور اللي مرت في الأنتظار بتتقلب جواكي كره وحقد وغضب مش بس علشان خسرتي حلمك لكن علشان استنيتي كتير قوي

متفكرنيش بالأنتظار بقى
وكل سنه وانتي طيبه
رمضان كريم

Unknown يقول...

خوف ............ للشخص اللي بيبحر للمجهول ومش عارف هيقابل ايه
الانتظار فعلاً صعب جداً .. بس سبحان الله لابد منه فى كل الاحوال بس الانسان عجولاً عشان كده بيستصعب الانتظار ...
كل سنة وانتى طيبة ..
رمضان كريم

Reem jalal يقول...

الشنكوتي الكبير /
وحضرتك طيب
حضرتك عندك حق فعلا ف اللي قولته وانا شوفت انه الافضل ان الواحد يمضي في حياته قدما بدلا من الانتظار

Reem jalal يقول...

اسماء بنت الشمس /
وانت طيبة يا جميل
الله اكرم